【職場生存必備系列—適應能力(上集)】#適應能力
雖則話「魚唔過塘唔會肥」，不過太過jumpy始終影響下任老細嘅第一印象。撇除為咗人工同升職目的，有部份人郁啲就話想轉工，其實係個職場大忌，欠缺應有嘅適應能力。
點解新一代較jumpy？因為比起上一代，依家屋企環境普遍比較好，財政負擔又無咁大，自然唔想為五斗米而折腰，東家唔打最多打西家！無錯，我都認同公司揀人，人都有權揀公司，但係如果轉工太頻密，係咪都要檢討反省下，自己適應能力有問題呢？
最常見係啱啱畢業嘅學生，滿懷一腔熱血，希望喺職場大展拳腳。點知入到公司後，發現工作環境同想像有出入，做嘅嘢亦無挑戰性，有感大才小用，所以無耐就毅然辭職。去到第二間公司，做落係比第一間好啲，但做做下都係無咩發揮機會，仲要開始受上司氣，同事又唔啱嘴型，唯有再次辭職。去到下一間公司，發現同期畢業嘅同學已經升職加人工，肩負起越嚟越責任重大嘅工作，再望吓自己，去到每間公司都係做新仔，又要重頭令對方建立信任。咁唯有努力追番進度，不過發現付出同收穫唔成正比，開始萌生起再轉工念頭......
其實每間公司都有自己文化，優點同缺點，邊有好似電裡劇裡面咁完美。除非完全唔care事業發展，就可以慢慢一直跌跌碰碰，直至搵到一間同你perfect match嘅公司為止，否則根基未好又辭職，事業只會一直原地踏步。達爾文《物種起源》講過，能夠生存落嚟嘅物種，並唔係最強壯，亦唔係頭腦最聰明，而係因應環境變化作出最快反應。所以話齋「改變唔到世界，就要改變自己」，如果識得磨合同付出，喺咩職場環境生存都無問題喇！
下一個post，教大家點樣提升職場適應能力。
Search